Titigan ang Sarili

Ang mabatid ang iyong layunin ang siyang nagbibigay ng makabuluhan sa iyong buhay.

Sa anumang larangan, iwasang laging nakatunghay sa ginagawa ng iba. Hindi mo katungkulan ang magmasid at titigan nang puspusan ang ginagawa ng iyong kapitbahay. Kung kakumpetensiya mo naman sa negosyo, kaysa inaabangan at inaalam ang kanyang ginagawa, wala kang kontrol para dito. Ang may kontrol ka lamang ay sa iyong sarili. Iwasang mabalisa tungkol sa karibal at panghinaan ka ng loob sa bagay na ito.
   Katulad sa pagmamaneho ng kotse, kung lagi kang nakatingin sa back mirror at pilit na tinitignan ang mga sasakyan na nasa likod mo at sumusunod sa iyo, malamang nito pulutin ka para sa ospital o, sa sementeryo. Ang mainam ay tumutok ka sa harapan mo at maging maingat.

   Sa karera ng pabilisan ng takbo, ang enerhiya na lumingon at tignan ang takbo ng katunggali ay kabawasan ng lakas, at kapag nakita mong malapit ka na niyang abutan, matatakot ka at manghihina pa. Subalit kung ang lahat ng enerhiya mo ay uubusin para lalong bumilis ang iyong pagtakbo, malaki ang porsiyento na mananalo ka. Huwag aksayahin ang iyong lakas at panahon sa paglingon at pagtitig sa mga katunggali, kung ito ay may mga kakayahan o kung anuman ang ginagawa nila. Ang tunggalian ay hindi tungkol sa katunggali mo. Ito ay tungkol kung ano ang makakaya mong gawin, kailangan lamang na gawin ang tungkulin mo nang higit pa sa iyong makakaya para ikaw ay manalo. Kailangang ibigay mong lahat ang magagawa mo sa pagkakataong ito sa iyong sarili. Para sa iyong sarili.

Walang makapaghuhubog sa iyong buhay gaya ng pagtupad sa iyong mga tungkulin na pinili mong isagawa.

Ang Aking Relihiyon

Ang maturidad o paggulang ay nililikha ng mga mabuting relasyon at pakikiisa sa pamayanan.

Ito ang aking nalalaman, kailangang akuin mo ang responsibilidad sa espasyong kinalalagyan mo. Saan ka man nakatayo at ginagalawan mo ngayon, may tungkulin kang kaakibat nito. Alalahanin lamang na sa pangatlong batas ng Mosyon, na kung saan ay ipinapahayag nito na, "Sa bawat aksiyon ay mayroong kalakip na kapantay at kasalungat na reaksiyon." Ito ang batayan at formula kong pinaiiral sa araw-araw.

   Ito ang pinakaubod at pangunahing pagbuo ng aking panuntunan sa buhay. Binibigyan laya nito na malaman ko ang bawat kaisipan na aking maiisip at kung papaanong pagpili ang isasagawa ko at magiging kapasiyahan para mahusay ko itong magampanan.

   Batid ko nang lubusan na sa bawat kaisipan na aking inayunan ay may kaakibat na aksiyon na siyang lilikha ng kapantay o kasalungat na reaksiyon. Kaya nag-iingat ako sa bawat bagay na aking iniisip, dahil may kasunod na mga aksiyon ito. At ang mga ito ay kusang bumabalik. Kapag may itinanim, may aanihin. Anumang panukat ang inilapat mo, ito din ang isusukat sa iyo. Kapag dumura ka sa langit, sa mukha mo ito ibinabalik. Batas ito ng Karma. Ibabalik sa iyo nang higit pa ang anumang ginawa mo.

   Ang gintong kautusan ay katotohanan at hindi mababali, na kapag may ginawa ka sa iba, ito din ang gagawin nila para sa iyo. Oopss... Nagawa na ito. Mayroong kumikilos na enerhiya sa kapaligiran, at ito ay mabisa kong nararamdaman. Ang taguri dito ay konsiyusnes, konsensiya, budhi, kamalayan, o, kagisingan. Madalas, tinatawag ko itong Dakilang Kamalayan. At marami akong kakilala na ganito din ang pakiramdam nila, lalo na ang matalik kong kaibigan, na si Karina Pollock, hindi siya nag-aatubili na panindigan ito. Kung mayroon ka nito, umiindayog ka din at sumasayaw na tulad ng hangin at nagpapatangay sa mga pag-ihip nito. Mistula kang yagit na tinatangay ng daloy mula sa isang sibol at nakikiisa sa mga pagragasa nito. At ang daluydoy nito ay diretsong kasukat anuman ang nagaganap sa iyong puso. Kung saan ang Diyos ay nananahan, kung saan ang enerhiya ng sansinukob ay nananahan, kung saan ang kabanalan sa iyong kaibuturan ay nananahan. Gaano ba ang layo mula sa sentro, mula sa banal na pugad ng iyong sarili, mula sa iyong koneksiyon sa pinanggagalingan ng enerhiya. Ito ang naglalang sa iyo, gaano man pakaisipin mo ang iyong buhay, kahit ano pa man ang itawag mo para dito.

Ang mabilisang pagtupad ang magtuturo sa iyo na makapaglingkod sa Diyos kaysa basahin at talakayin nang buong buhay ang Bibliya.

Tunay na Intensiyon

Kung susukatin ang walang hanggan, ang ating panahon sa mundo ay isang kurap lamang. Subalit ang mga resulta nito ay nagtatagal magpakailanman.

Marami ang hindi nakakalam na tayo ay mga ispirito na nagkatawang tao. Ang tungkulin natin ay tuklasin ang ispiritung ito sa ating kaibuturan, narito ang Kaharian ng Langit. At maiugnay ito sa Banal na Ispirito na naghahari sa buong sansinukob. Kapag nagawa mong iugnay ang iyong sarili dito, walang sinuman ang makakahipo pa sa iyo. Ito ang iyong "wagas na kapangyarihan." Ikaw lamang ang higit na may karapatan upang isagawa ito. At walang sulsol o maging pakikialam ng iba. Kapag ang iyong pagkatao ay inilaan sa paglilingkod; ang enerhiya ng iyong kaluluwa, ay ang iyong wagas na kapangyarihan. Narito lamang kung saan nakalagay ang iyong kapangyarihan, sapagkat maliban dito ang lahat ng mga bagay tungkol sa iyo ay mawawala.

   Ang katawan mo ay gumugulang at pahina, at dumarami ang kulubot sa iyong mukha. Ang kagandahan mo ay naglalaho at napapalitan ng pagtanda. Kahit ano pa ang iyong gawin na magpaganda at mapahinto ito, alam mo na hindi ito magtatagal at kusang ding mawawala. Mistula lamang na mga bulaklak sa paso ito na bumukadkad sa kasiglahan ng buhay at nagsaboy ng bango, ngunit sa kalaunan ay malalanta at wala nang saysay pa, kundi pataba sa lupa. Ang panahon ay patuloy at hindi ka kailanman hihintayin nito. Hindi na kailangan gaano mang yaman mayroon ka, kahit na mataas na posisyon pa ang iyong katungkulan, kahit na napuno ang dingding mo ng mga papuri at mga katibayan, o maging ang kakayahan mong mabuhay pa, lahat ng mga ito ay nagbabago, mawawala at iiwanan mo.

   Lahat ay kumukupas, naglalaho, at pinapalitan, wala kang madadala kahit na isa mang palito ng posporo. Ang tunay na wagas lamang, at siyang nagtatagal, ay KUNG SINO KA at kung ano ang tunay na kinalabasan ng iyong pagkatao. Ito ang iyong pamana. Ano ang iyong inihandog na buong puso mong ibinigay nang walang pag-aatubili man at walang kapalit na hinihintay. Walang sinuman ang makakakuha nito mula sa iyo. Ito ang iyong tunay na layunin at tungkuling inatang sa iyo; ang maglingkod. Ibigay ang iyong panahon at kalakasan na kung saan ang proseso ng iyong isipan ay hindi lamang makagawa ng mabuti, kundi ang gumawa ng kabutihan para sa kapakanan at kaunlaran ng lahat sa pamamagitan ng Bayanihan.

Ang tunay na manifestasyon para sa kaluwalhatian ng Diyos.

Kapag patuloy ang pagpapala sa iyo ng Diyos, lalong higit na responsibilidad ang inaasahan Niya sa iyo.

 

Magtanong nang may Masagot

Kung nais mong makatiyak sa pagpapasiya kapag nahaharap ka sa matinding pagsubok, kailangan mayroong kang mga katanungang para dito. Pag-aralan itong mabuti at piliin lamang ang naa-angkop na tamang katanungan mula sa mga ito. At ang paglalaan ng mga karampatang kasagutan, bago ka magpasiya. 

   Ito ang mabisang panuntunan sa buhay. Tulad ng pagluluto, kung sinigang na isda ang binabalak mo, kailangan ang mga tamang sangkap nito at ang tamang paraan ng pagluluto, ayon sa iyong panlasa upang ito'y maging malinamnam.

   Ganoon din pagdating sa mga hakbangin ng iyong pakikibaka sa buhay. Kapag ikaw ay may pag-aalinlangan, gumawa ka ng tamang katanungan at ito'y may katumbas na tamang kasagutan. Kailangan lamang ay ang malaman, maisaulo, gamitin, at ipamuhay. Kapag may disiplina, makakaiwas sa problema.  

Mga Tamang Katanungan sa Buhay                                                      

   Ito ang sadyang mapa o alituntunin na magagamit mo para makarating sa iyong paroroonan. Maging matapat lamang na nalalaman mo kung nasaan ka ngayon, saan mo ibig pumunta, at tandasang natitiyak mo na ito nga ang ibig mo na puntahan. At maligaya kang ipamuhay ang kapasiyahang ito.
   Mga tamang katanungan na magdudulot sa iyo ng inspirasyon at kapangyarihan. Piliin ang katanungang angkop sa  pagkakataon, at lalagi kang gising sa mahalaga mong mga hangarin at kalalabasan nito.

  Narito ang 10 tamang katanungan:

Tanungin lamang ang iyong sarili.

1. Ang  pagpili bang ito ay maghahatid sa akin tungo sa maaliwalas na kinabukasan, o lalo lamang 

    magbabaon sa akin sa nakaraan?

2. Ang pagpili bang ito ay magdudulot sa akin ng mahabang kaganapan, o magpapatighaw lamang 

    sa akin ng dagliang kasiyahan?

3. Isinasaalang-alang ko ba ang aking paninindigan, o pinipilit ko lamang na asikasuhin na 

    masiyahan ang iba?

4. Ako ba’y nagmamasid sa kung ano ang tama, o ako’y nagmamasid sa kung ano ang mali?

5. Ang pagpili bang ito ay makapag-papasulong sa kabatiran ko, o makapag-papaurong

    pa sa aking kamangmangan?

6. Magagamit ko ba ang sitwasyong ito bilang batayan sa  kamulatan, o magagamit ko para sisihin

    lamang ang aking sarili nang paulit-ulit?

7. Nagagawa ba ng pagpiling ito na palakasin ang aking loob, o nagagawang pahinain ang aking loob, upang mawalan ng pag-asa?

8. Ito ba’y hakbang na pagmamahal sa sarili, o isang hakbang na pagwawasak sa sarili?

9. Ang pagkilos bang ito ay batay sa pananalig, o likha lamang ng pagkatakot?

10. Pinipili ko ba ang pagiging marangal ko, o pinipili ko ang naaayon sa kagustuhan ng iba?

   Tahasan kong inimumungkahi ang paggamit ng 10 katanungan na ito sa bawat pagpili ng mga hangarin, o mga lunggati sa buhay. Sapagkat matutunghayan sa uri ng iyong pamumuhay (kalagayan) sa ngayon, ang resulta ng lahat ng mga hakbang na nagawa mo sa nakaraan. Sa paggawa ng mahalagang mga desisyon, madali mong maliliwanagan kapag ang pinili mo’y makatutulong o makasasama, kung ito’y nagmumula sa makabuluhang pananaw o sa panandaliang pangarap (pantasya), o nanggagaling sa pag-aalinlangan o sa pagkatakot, o maging sa pananalig, o sa paimbabaw na kalutasan.

Maligaya ka ba ngayon? O, malungkot? -at masalimoot ang buhay?