Patuloy na manalig sa direksiyon ng
iyong mga pangarap
dahil dito nakasandig ang iyong hinahangad na kapalaran.
Matayog na mangarap. Panain ang buwan. Kung hindi ito
tamaan at bumagsak ang busog, kahit pipit ay mahahagip, kaysa asintahin ang
mababa at bulati ang mapala.
Lahat ng tao ay may pangarap, lahat ay
may hinahangad. Dangan nga lamang, kakaunti o iilan lamang ang tahasang
kumikilos para ito matupad. Batid natin na minsan lamang ang ating buhay sa
mundong ito, kaya marapat lamang na pakawalan ang anumang kinakatakutan at
tahasang tuparin ang ating mga pangarap.
Anumang
bagay na paulit-ulit mong ginagawa sa araw-araw, ito ang talagang ninanasa
mo. Dahil kung ito ay hindi mo gusto, noon pa ay itinigil mo na. At kung
talagang nais mong mabago ang iyong kalagayan sa buhay, babaguhin mo ang mga
kinasanayan at kinaugalian na nagpapahirap sa iyo.
Huwag aksayahin ang bawa’t saglit na hindi
ginagawa ang mga bagay na nagpapasaya sa iyo. Iwasang maabala ng mga bagay na
walang mga katuturan at hindi nagpapaunlad para sa iyong kapakanan. Masusing
pag-aralan ang bawa’t pagkilos sa maghapon, kung ang mga ito ay nakakatulong at
nagpapasulong para matupad ang iyong pangarap. Kung hindi, simulan nang magbago
at piliin lamang ang mga bagay at mga aksiyon na nagpapabilis sa iyong mga
lunggati na maganap.
Ano pa ang hinihintay mo? Simulan na
at ang lahat ay madali na lamang.
No comments:
Post a Comment