May Bumabagabag ba sa Iyo?

Hindi nagtatagal gaano man kahirap ang panahon, ang tumatagal ay ang tao na matibay.

Anong bagay ito na hindi nakikitang epidemya o nakakamatay na sakit, at kahit na pinakamahusay na gamot ay hindi ito nagagawang malunasan. Sapagkat sinuman ay hindi ito makakayang mahawakan man. Maging ang pinakamalakas na microscope ay hindi ito makita. Subalit patuloy ang pag-usad nito, patindi nang patindi… at walang hintong pinasasakit ang ating mga ulo. Sa araw-araw ay binabalisa tayo nito, nililito upang mawalan ng sigla sa ating mga gawain, at ang pinakamasaklap pa, kapag hindi na natin magawang tiisin ang pagpapahirap nito ay nagpapatiwakal tayo upang tapusin na ang matinding pasakit nito.

Ano nga ba ito?  Ang BAGABAG (stress).  Lahat tayo ay nadarama ang epekto nito. Winawasak ang katinuan ng ating isipan at pinalalabo ang hangarin nating magpatuloy pa anuman ang ating nasimulan. Marami ang umaayon na sa panahong ito, sa kabila ng makabagong teknolohiya tulad ng google, twitter, facebook, selpon, at maraming iba pa sa internet, walang mga katanungan na hindi nasagot. Sa isang pindot lamang ang inpormasyon ay atin nang nalalaman. Ngunit, bakit may bagabag pa tayo at sadyang may kulang pa na hindi natin masagot. Dahil sa isang dahilan; Hindi natin matanggap kung sino tayo, ano ang ating tunay na layunin, mga naisin at saan tayo papunta.

   Marami ang nagkakasya na lamang na magreklamo, dumaing, at manisi. Naging ritwal na para sa kanila na sa halip harapin ang mga responsibilidad at mga pagkukulang, higit na madali ang ireklamo, idaing at isisi ito sa iba. Sa mga kadahilanang ito, binabagabag sila ng kanilang konsensiya (kung mayroon man) at kung wala nito, ay naghahanap pa ng magiging kagaya nila para maging masaya (misery loves company).

   Madalas kong binabanggit, kapag ang tungkulin mo ay hindi mo ginampanan noong Lunes at ipinagpabukas mo pa, pagdating ng kinabukasan, karagdagan pa ito sa panibagong tungkulin na nakaatang sa Martes, papaano na ang mga nakaeskedyul pa sa mga araw ng Miyerkoles, Huwebes, at Sabado kung patuloy na nagpapabaya ka sa iyong mga tungkulin sa mga araw na ito. Maaari ka bang magpahinga pagdating ng Linggo? Ito ang mga bagabag na unti-unting papatay sa iyo hanggat patuloy kang tumatakas sa sarili mong reyalidad.

   Kaysa kumikilos nang walang kontrol sa mga gawain, bakit hindi kontrolin ang sarili at baguhin ang mga nakasanayang mga pag-uugali (attitudes and behaviors)? Sa halip na malito at mabagabag sa tuwina at pahirapan pa ang sarili, bakit hindi natin tanggapin ang katotohanan at makiayon sa nangyayari? Kung hindi natin magawang baguhin ang sitwasyon o mga kundisyon na nakapaligid sa atin, magagawa naman nating mabago nang tahasan ang mga pag-uugali sa ating mga sarili kung papaano natin ito haharapin. Nasa ating mga pagpili (choices) at mga desisyon nakasalalay kung tagumpay o kabiguan ang ating tatahakin.

   Kung may kontrol ka sa iyong buhay, ito ang susi sa pagkakaroon ng tunay na ekspektasiyon sa araw-araw na pakikibaka. Isang pangunahing sangkap sa maligayang pamumuhay. Katulad ng kaligayahan, isa itong pagpili upang maging masaya sa tuwina. Hindi maiiwasan ang bagabag, subalit nasa iyo kung papaapekto at hahayaang mong kontrolin ka nito.

Ang pinakamainam na sandata laban sa bagabag ay ang ating abilidad na piliin ang isang positibong kaisipan at ipalit ito sa bumabagabag na negatibong kaisipan.

Magbago na Tayo

Ang pagbabago ay batas ng buhay. At doon na laging nakatingin sa nakaraan at hinaharap ay makakatiyak na makakaligtaan ang nagaganap ngayon.

Sa ngayon, napakaraming bagay sa ating kapaligiran ang nag-aagawan para makuha ang ating atensiyon. Halos hindi na natin malaman kung ano ang ating dapat na unahin. Nariyan ang selpon na kung saan sa isang saglit lamang at pindot ay puwede mo nang makausap at makateks ang sinuman saan mang panig ng mundo. Nariyan ang sosyal media tulad ng Facebook, Twitter, Google, at iba pa sa internet para sagutin anuman ang hinahanap at itinatanong mo. Dangan nga lamang nakakaligtaan natin kung para saan ang lahat ng mga ito. Sa kabila ng mga makabagong teknolohiyang ito, sa halip na mapabilis at gumaan ang ating mga gawain may mga bagabag pa tayo na palaging nagpapasakit sa ating mga ulo. Nakakalimutan nating sumabay at maging bahagi ng mabilisang mga pagbabagong ito sa ating paligid.

3 Susi na Nagtutulak para Magbago

Mga TAO

Narito ang hayagang dahilan kung bakit kinakailangan nating makipagsabayan at sumama sa agos. Parami nang parami ang mga tao ngunit pangunti nang pangunti ang mga oportunidad at mga panustos sa mga pangangailangan sa ating kapaligiran. Patuloy ang pagyaman ng iilan at walang hinto sa pagdami ang naghihirap. Kung hindi ka gagawa ng mga kaparaanan upang maiba ka sa karamihan, magiging katulad ka rin nilang hindi makaahon sa kinasadlakan.

Kung hindi ka kikilos para paunlarin ang iyong sarili, paghusayin ang iyong mga kakayahan at dagdagan pa ang iyong mga kaalaman, maiiwanan ka sa karera ng buhay. Katulad ng itak na hindi mo hinahasa, kakalawangin ito upang pumurol.

Teknolohiya

   Talos natin na ang teknolohiya ay produkto ng nag-uunahang karera ng mga tao para umunlad, maaasahan natin na ang mabilisang pagbabago ay sinusunod ang mabilis ding pagdami ng mga tao. Hanggat patuloy ang paghahanap ng mga bagay para matugunan ang mga pangangailangan ng lahat, patuloy din ang mga pagsasaliksik, mga paggawa, at mga inbensiyon. Yaon lamang mga tulog, natutulog, at nagtutulog-tulugan ang palaging napag-iiwanan.

Inpormasyon

   Ito ang pangatlong pangunahing nagtutulak para sa pagbabago. Batid natin na higit na marami at malawak na inpormasyon ang naipamahagi sa loob ng 45 taon sa pagitan ng 1970 at 2015 kaysa noon pang nakalipas na 3,000 taon hanggang 1970. Sa katunayan ang bilang ng inpormasyon na magagamit natin sa ngayon ay nagiging doble sa bawat 5 taon lamang. At karagdagan pa, lahat ng mga kaalamang ito at inpormasyon ay nakalaan sa lahat ng tao at makukuha anumang naisin nila sa lahat ng oras.

   Ibayong kaalaman na patuloy na dinadagdagan, at walang hintong nakukuha ng mga tao sa lahat ng panig ng mundo nang higit na mabilis kaysa dati. Ang punto dito? Ang higit na inpormadong mga mamamayan ay may malaking oportunidad at mga pagkakataon para magbago para sa kaunlaran. Kung wala kang nalalaman wala kang masisimulan para makagawa tungo sa kaunlaran.

   Marami ang hindi nakakapansin na ang pagbabago ay patuloy at hindi ka nito hihintayin. Pagmasdan lamang ang iyong sarili, hindi na ito katulad pa noong dati. Malaki na ang ipinagbago nito. Maging ang dating paniniwala mo ay nagbabago na rin at sumasabay sa makabagong panahon. Subalit ito ang reyalidad: kailanman, saanman, at anupaman hindi na mababago pa ang iyong mga prinsipiyo at mga patakaran sa buhay.

Kung nais mong magbago ang mga nasa paligid mo, simulan mo sa iyong sarili mismo.