Umidlip Lamang Huwag Matulog

Magising Ka Naman

   Ang dahilan kung bakit gising ang ilang tao, ay sapagkat tumigil na silang pumayag sa mga bagay na nang-iinsulto sa kanilang kaluluwa.

Makakabuti ang Pagtalikod

Nangyayari lamang ang mga bagay kung ikaw ay may pahintulot at lalo na kung may partisipasyon. Magagawa naman na talikuran at iwasan na ang mga ito, ...kung nanaisin mo.

Talikuran ang walang saysay na mga pagtatalo na humahantong sa alitan at kapahamakan.

Talikuran ang mga tao na humahamak at nagmamaliit sa iyo na hindi nakikita ang iyong kahalagahan.

Talikutan ang mga tao na kilala ka lamang kapag may kailangan sa iyo at may amnesya kapag kailangan mo sila.

Talikuran ang nakasanayang pagsunod sa kapritso o pagiging masunurin sa hilig ng iba.

Talikuran ang mga bumabalisa at nagpapagulo sa iyong isipan. Stress at dis-ease ang hatid nito.

Talikuran ang mga kritiko, mapamintas, at mapaghatol na mga tao. Papatayin ka nila sa konsumisyon.

Talikuran ang mga pagkatakot at mga kamalian na sumisira ng iyong hangarin na magtagumpay.

Talikuran ang mga walang saysay na mga libangan na umaagaw ng iyong mahahalagang sandali.

... at HARAPIN ang mga paghamon na gumigising at nagpapalakas sa iyo upang magtagumpay sa buhay.

Kapalaran Ko Ito

Sa lahat ng sandali ay laging may bumubulong na mahiwaga at munting tinig sa ating isipan. Dalawang uri ito; positibo at negatibo, kaligayahan at kapighatian, tagumpay at kabiguan, pagkabuhay at kamatayan.  At nasa iyong kapangyarihan kung sino ang susundin mo. Kung sino ang lagi mong sinusunod AT nangingibabaw sa lahat ng sandali ng iyong buhay, ...ito ang lumilikha ng iyong kapalaran.

Kunin Lamang ang Nakakabuti

Hindi lahat ng nasa iyong harapan o hapag ay kukunin mo nang buo. Kahit papaano ay may aalisin ka. Katulad sa pagkain ng isda, ang laman lamang ang maaaring isubo hindi ang mga kaliskis at mga tinik nito. Ganito din sa relasyon, tanggapin at gayahin ang mabubuti. Iwasan at huwag nang pamarisan o dagdagan pa ang mga kasakitan at wala sa katwiran.

Bawal ang Manggaya

Iwasang ikumpara ang iyong buhay sa iba at huwag hatulan sila. Hindi mo naranasan o ganap na mauunawaan ang nagawa nilang paglalakbay sa buhay.

Hayaan Sila

Kung nais mong talaga na maipamuhay ang iyong buhay na maligaya at matagumpay, marami ang hindi masisiyahan sa magaganap sa iyo. Mayroong maiinggit, maninibugho, magagalit, mamimintas at maninira. Marami sa kanila ang hindi matatanggap na nalagpasan mo sila, kung bakit nagawa mo ito at kung papaano. Subalit ang mga taong ito ay walang kinalaman anumang tungkol sa iyong buhay. IKAW lamang at hindi sila ang may tungkulin para sa iyong sarili.

... at ang pinakamahalaga, bago mo lisanin ang mundong ito, patugtugin mo naman ang iyong musika.

Masaya Ka na ba?

Maging masaya at palaging tumawa

Ngumiti, tumawa at humalakhak gaano man kabigat ang problema, dahil naisin mo man o hindi kusa itong magwawakas. Damahin ang kasalukuyan at pagindapatin ito kaysa maligalig sa nakaraan at katakutan ang hinaharap. Ang tanging may kapangyarihan ka na makagawa ng pagbabago ay hindi kahapon o bukas kundi NGAYON. 

Bilangguang walang rehas

Iwasang maging bilanggo ka ng iyong nakaraan kapag lagi mong binabalikan at binubuhay ang iyong mga kamalian. Payapain ang iyong nakaraan at iwaglit na ito sa isipan, upang hindi makawasak  sa kasalukuyan.

Problema na Huwag nang Problemahin pa

Mapabuti o mapasama man, ngumiti lamang at ang lahat ay madali na lamang. Hindi ikaw ang may-ari ng lahat ng problema sa mundong ito.

   Ang problema ay hindi pinag-uusapan kundi nilulunasan.

Talakayan sa Barangay Kupang

Nakakahiya daw

Hindi nakakahiya ang magkamali. Ang higit na nakakahiya, ...'yong lantarang mali ka na... pinipilit mo pang baluktutin ang kamalian mo at ipakitang tama ka. Ang masaklap pa dito, personalan na kung hiyain mo ang kausap ng mga paratang na walang katotohanan.

Iwasang Magalit

Ang pinakamainam na pagganti ay umiwas na lamang at tanggapin na isang leksiyon ang nangyari upang hindi na ito maulit pa. Huwag magbigay ng satispaksiyon na makita kang namimighati sa nangyari. Hanggat inaala-ala mo ang naganap at nag-iisip ng pagganti lalo lamang na pinalalakas mo ang hapdi ng nagawang kamalian.

Kailangang malaman natin at isagawa kung bakit lumitaw tayo sa mundong ito: 

Ano ba ang iyong layunin?

Anu-ano ba ang iyong mga responsibilidad?

Papaano mo ginagampanan ang iyong nakatakdang mga tungkulin?

May malasakit ka ba sa kapakanan ng iba?

Ano nga ba ang iyong tungkulin ngayon?

Likas na Katungkulan

Hindi ikaw lumitaw para mahalin o hangaan kundi ang magmahal at maglingkod. Hindi katungkulan ninuman lalo na yaong mga nakapalibot sa iyo na mahalin ka. Kundi ang magmalasakit at maging kasangkapan sa ikakapayapa at ikakaunlad ng inyong kapaligiran, ito ang iyong katungkulan.

Maging ikaw

...kahit na anuman ang iniisip ng ibang tao, ikaw pa rin ang may karapatan at may kapangyarihan tungkol sa sarili mo. May mabuting dahilan kung bakit ka nilikha at lumitaw sa mundong ito. Isaisip palagi, na orihinal at pambihira ka at walang katulad sa balat ng lupa. Higit kang mahalaga kaysa isang kopya!

 Jesse Navarro Guevara
Lungsod ng Balanga, Bataan

Saan Ka ba Talaga Patutungo?

J

Jesse Navarro Guevara

Lungsod ng Balanga, Bataan

Igalang ang Sarili

Kung may nais kang makuha, ito ay ibigay mo muna. Tulad ng paggalang, hindi ka kailanman igagalang nang hindi ka muna gagalang. Kailangan mong umunawa bago ka maunawaan. Kailangan mo ng edukasyon? Mag-aral ka muna. Kailangan mong mahalin? Magmahal ka muna.

At taliwas naman dito;

   Kung wala silang respeto, o pagpapahalaga at pagbubunying inuukol para sa iyo, makakatiyak ka na wala silang panahon at hindi ka nila kailangan. Para sa kanila, isa kang problema at hindi solusyon. Ito na ang tamang panahon na umiwas ka at mahalin sila nang may distansiya.

   Hintuan na ang mag-aksaya pa ng iyong panahon sa mga tao na walang pagpapahalaga sa iyong atensiyon. Tandaan lamang ito: Ituon ang iyong panahon sa mga tao na sadyang may pagmamaahala sa iyo. Ang panahong inuukol mo sa mga tao na may pagmamalasakit at pagpapahalaga sa iyo ay walang katumbas. Ito ang iyong tamang karelasyon.

Bakit po???
Sapagkat kung saan ka masaya, naroon ang puso mo.
...at doon naman sa mga tao na walang malasakit at pagpapahalaga para sa iyo;

Huwag ipagdamdam sakalimang balewala ka sa kanila. Dahil ang walang pakiramdam na mga tao ay walang kakayahan para sa mga ekspensibo o mahalagang mga bagay, sapagkat maramot at walang maibabayad (panahon) sila.

…at, siyanga pala, iwasang habulin ang mga ganitong tao. Igalang ang sarili na maging tunay ka. Gawin kung ano ang tunay na mahalaga para sa iyo, at hindi mula sa mga sulsol nila. Ang wagas at tamang mga tao na sadyang nakaukol para sa iyo ay darating at mananatili sa iyong tabi. Ito ay nasusulat at nakalaang katotohanan.

Bakit po?

Sapagkat sa buhay na ito; may mga tao na darating sa iyong buhay bilang mga pagpapala, at may mga iba naman na dumarating bilang mga leksiyon. Palaging may mga kadahilanan kung bakit may mga tao na nakakasabay o nakakasalubong tayo, may leksiyon at pagtuturo. Sa dalawang pagkakataon na ito, kailangan mong baguhin ang iyong buhay, at kung hindi naman ay ikaw ang babaguhin nila.

 

Magiliw na Relasyon

Hindi natin maitatanggi na sa bawat pakikipag-kapwa ay may panuntunan tayong sinusunod. Marapat lamang na maala-ala nating muli ang mga ito nang hindi tayo maligaw at mauwi sa alitan ang ating mga relasyon.

1-Huwag makaligtaan ang isang pagkakataon na banggitin ang isang magiliw at nagpapatibay na mga kataga o pangungusap tungkol sa isang tao. Magpahalaga at pumuri sa mabuting gawain, kahit na sinuman ang may gawa nito.

2-Kapag ikaw ay nangako, pahalagahan at tuparin ito nang walang anumang alinlangan. Huwag basta mangako nang hindi mapako.

3-Pigilan ang dila, kung maaari lamang ay gapusin ito. Sapagkat may kapangyarihan itong pumatay at bumuhay. Alamin kung ito ay sanhi ng biglaang emosyon o masusing paglilimi ng isipan. Kung papaano mo ito binibigkas; asta at diin ng mga kataga ay naghahayag ng damdamin at kadalasan nakakalimutan natin na may pakiramdam ang ating kaharap at marunong ding masaktan. Kung bugbog lamang ay puwede itong makalimutan ng isang tao, subalit ang saktan ang kanyang damdamin, hindi niya ito makakalimutan sa habang-buhay.

4-Ipahayag ang iyong interes sa iba, magbigay ng kaukulang atensiyon---sa kanilang mga pangarap, sa kanilang mga gawain, at gayundin sa kanilang mga pamilya. Magbunyi at magsaya na kasama ang mga tao na may pagpapahalaga at may respeto. Makiramay at tumulong sa panahon ng kanilang mga pangangailangan. Tanggapin ang bawat isa na iyong nakakasabay at nakakasalubong sa buhay bilang mga importante at espesyal na ipinadala sa iyo para pagandahin ang iyong paglalakbay sa buhay na ito.

5-Maging masayahin at magiliw kaninuman. Iwasang dumaing at gawing basurahan ng iyong mga hinaing, mga reklamo, mga paninisi, mga pagka-inggit at mga inseguridad ang kaisipan ng mga tao na iyong nakakasama.

Tagubilin ni Inang: “Ang mabisang paraan para mamuhay nang masaya kapag kapiling ang ibang tao, ay ang umiwas na pumuna, pumintas, at manisi, kundi ang banggitin nang may paghanga ang kanilang mga kabutihan at pagiging uliran.” Sa madaling salita; “Pumintas nang lihim at pumuri nang hayagan.”

Wala nang Iba pa

Takasan ang Kamalasan

Habangbuhay ang Edukasyon

Nangangarap nang Gising

Mag-ingat po

Huwag Mag-akala nang hindi Mabahala

Nasa Pagbabago ang Progreso