Gaano ba Karami ang Sapat?

Ang sagot ng isa, "Humigit-kumulang ay eksakto!" Sabad naman ng katabi, "Walang labis, walang kulang!" Dugtong ng pangatlo, "Walang bawas, walang dagdag!" At tinapos ng huli, "Hindi kapos, ngunit pantay!"

...ang tamang kasagutan para dito ay... KULANG!

Dahil walang palabis o karampatang dagdag. Madalas nating naririnig, "Magkano ang sahod mo sa isang buwan?" Umiiling na sumagot ito, "Sapat lamang sa aming pangangailangan. Sa ibang gastusin, talagang kinakapos kami." Sa madaling sabi, "Isang kahig, isang tuka! Eto... ang buhay namin, SAPAT lamang."

At sabay na naghimutok, "Basta makaraos, at nabubuhay pa... puwede na."

3 Uri ng Pagmasid

1-Karaniwan o ordinaryo -Sapat o kuntento na. Konting bubong at manipis na kumot ay pinagtitiisan.

2-Di-pangkaraniwan -Humihingi ng umento, at hindi masaya. Palaging umaasa at naghihintay ng milagro.

3-Ekstra-ordinaryo -Hindi kuntento, karagdagang kumikilos at pinipilit na mabago ang kalagayan sa buhay.

Saang puwesto dito ikaw nakalagay?

Mulat Ka na ba?

Malaki ang mga pagkakaiba ng mga ito:

Mulat -Laging nakadilat ang mga mata at nababatid ang nagaganap sa kanyang kapaligiran. Handang dumamay at makipagtulungan.

Gising -Paminsan-minsan nagigising at sandaling nalalaman ang kaganapan ngunit madalas makalimot at nag-iiba ang mga iniisip. Hindi nakakatiyak sa intensiyon kung ito nga ang nais.

Idlip -Laging naiidlip kahit nakadilat ang mga mata. Ligalig at nakatuon sa nakaraan at nag-

   aalaala sa hinaharap. Madalas makalimutan ang kasalukuyan. Palaasa at laging naghihintay sa

   mangyayari.

Tulog -Walang kamalayan o pakialam sa mga kaganapan sa kanyang paligid. Hindi maaasahan.

Natutulog -Hindi maaaring abalahin. Laging takot, higit na mahalaga ang magsarili nang hindi

   masangkot. Idinadaan na lamang nag mga problema sa pagkalimot.

Nagtutulog-tulugan - Mahirap gisingin, Walang pakialam, anumang mangyari, kahit lantaran  

   na ang mga kabuktutan at kamalasan. Higit pang ninanasa ang manood na lamang at mag-

   usisa nang walang anumang solusyon na ginagawa.

                          

Narito ang tunay na may KAMULATAN

Batid at namamalayan ang mga pagkakaiba ng mga isinasaad sa itaas. Hindi niya hinahayaan na makapanaig ang mga ito sa kanyang isipan, emosyon, at mga gawain.

Siya mismo ang nasusunod at hindi ang kanyang isipan. Kung ano ang higit na mahalaga naroon ang kanyang puso.

May Intuwisyon Ka ba?

INTUWISYON:

Tuwirang kaalaman kung ano ang tunay at naaayon sa bawat sitwasyon nang hindi kailangan ang katibayan; isang persepsyon o pananaw na nalilikha kapag ang katawan, mga emosyon, isipan, at ispiritu ay magkakasabay na kumikilos at nag-uugnayan habang lubos na nakatuon sa kasalukuyang sandali; isang kamalayang nakadarama at nakakaunawa sa pagkakaisa ng lahat ng nabubuhay na mga bagay at nakakaranas ng pagkakaisa, pagdadamayan, at pagtutulungan na likhain ang kalikasan ng buhay.

Napansin Mo ba?

Ang kalangitan ay walang Silanganan, maging Hilaga o Timog at pati Kanluran ... ni walang pagkakaiba sa pagitan nito, niyan, iyon, niyon, iyan, at ito. Ang mga pagkakaiba o pinagkaiba ng lahat ay nagsisimula lamang sa mga kaisipan ng tao mismo. Alisin lamang ang taguri, label, pagpapangalan o pagkakakilanlan... magiging madilim ang lahat. Kapag wala ng kataga na ihahambing, ano pa ang iyong magagawa? Wala nang imahinasyon na magsisimula.

Pag-ikot ng Mundo

Ang mundo ay umiikot nang walang hinto. Naglalakbay ito ng napakabilis at libu-libong milya sa bawat segundo, sa loob ng 60 segundo o isang minuto, 60 minuto o isang oras, 24 na oras o isang araw, 28-30-31 na araw o isang buwan, 12 buwan o isang taon... bago maikot ang Inang Araw. Wala itong kinikilingan o paborito, kahit anong bagay, banal o demonyo mang tao. Sisilay at maghahandog ito ng kanyang liwanag at init para biyayaan ang sinuman. Wala itong pakialam purihin man o sumbatan, sapagkat ito ang kanyang katungkulan. 

---at ang pinakamahalaga sa lahat, wala itong relihiyon, sekta, o grupo na sinusunod. 

Palakaibigan Ka ba?

Ang maging Matalik na Kaibigan

Marami ang uri ng relasyon, ang pinakamahalaga dito ay ang pakikipag-kaibigan. Maging ang mga malapit sa iyong kalooban, pamilya (pinanggalingan, itinatag, at pinili), at maging mga kamag-anak. Lahat ay kailangang magsisimula sa pakikipag-kaibigan. Mauuna ang Pagmamahal, magmamahal, bago ka mahalin. Kung wala kang pagmamahal, maging sa iyong sarili... hindi mo magagawang ibigay ang bagay na wala sa iyo.

1- Maging IKAW. Walang balatkayo o pandaraya, orihinal at tunay na makipag-kaibigan.

2- Bukas-ang-puso. Walang mga paghatol o mga kundisyong pinaiiral kundi ang pagmamahal at pagmamalasakit.

3- Makiisa at tumulong. Sumama sa mga samahang nagtataguyod ng Pagkakaisa tungo sa kaunlaran, kapayapaan, at tagumpay ng lahat.

4-Simulan sa mga tao na kakilala. Balikan ang mga nakasama noon, kamustahin ang mga naging kasamahan, mga kaeskuwela, at mga kapanalig. Tanggapin ang mga imbitasyon at makipag-kaibigan.

5- Kilalanin ang karakter ng tao. Sino nga ba siya? Ano ang kanyang mga pinahahalagahan at mga prinsipyo? Magkatulad ba kami ng layunin, pangarap, at motibasyon sa buhay? Papaano ba siyang makisama o makipag-relasyon? Papaano ba ang turingan sa kanyang mismong pamilya?

6- Makipag-ugnay nang wagas at magiliw. Ipadama ang marubdob na pagnanasang makipagkaibigan.

7- Bukas-ang-palad. Madaling lapitan at handang tumulong anumang sandali.

8- Matapang at matuwid. Handang itama ang kaibigan kapag ito ay nagkamali o nalihis ng landas. Hindi alintana anuman ang mangyari, kahit na itakwil pa ng kaibigan kung para sa kapakanan nito ang ikakabuti.

9- Walang itinatangi. Basta kaibigan, lahat ng mga kaibigan nito ay kaibigan mo rin. Walang pinipili at pagkontrol na umiiral.

10- May pananalig at isang salita. Makikita sa gawa at hindi sa salita, nasa resulta ang lahat kung totoo o huwad ang isang tao.

Marunong Ka bang Umiwas?

UMIWAS: HUWAG nating gawin ang mga ito:

HUWAG mong hayaan na makapangyari ang mga negatibo at nakakalasong bagay na makaapekto sa katinuan ng iyong isipan. At sa kalaunan ay mistulang lason na unti-unting pumapatay sa iyo.

HUWAG hayaan ang mga aksiyon ng ibang tao ay magdulot ng kapighatian sa iyong puso.

HUWAG hayaan na manaig ang kalapastanganan ng iba ay sirain ang maganda mong pangarap.

HUWAG hayaan ang patuloy na pamumuna, pamimintas, at pananakit sa iyong damdamin.

HUWAG hayaan ang mga paninira sa iyong reputasyon na wasakin ang iyong pananalig sa sarili.

HUWAG hayaan ang mga taga-duyan, mga tagasulsol, at mga tagausisa na makialam sa iyong sariling buhay. Hindi sila ang mapapahamak kundi ikaw mismo.

HUWAG hayaan ang kayabangan at pagmamataas ng iba ay magaya mo kapag nakisama ka sa kanila.

HUWAG hayaan na tuluyang mawasak ang iyong pamilya sa kasamaan ng isang miyembro nito.

HUWAG hayaan ang iyong kapaligiran na maging maingay, marumi, at magulo, hindi ka patatahimikin nito. Gawing tahimik, malinis, at maayos ang lahat, ...para manaig ang kapayapaan.

HUWAG hayaan na laging maging biktima ks sa kamalian at pagsasamantala ng iba.

HUWAG hayaan na manatiling bilanggo ka ng walang sawang pang-aabuso sa iyong kahinaan.

HUWAG hayaan na mawalan ng kabuluhan ang mga aral at leksiyon na iyong naranasan. Sa pamamagitan nito ... ang siyang magpapalakas sa iyo na tumindig at lumaban para sa iyong kapakanan.